PAISLEY FAIR SATURDAY – DOON THE WATER
Doon cam’ the rain splashing in torrents,
The sheughs and the sivers were a’ rinnin’ower;
Jaunters, gey doolie, sair drookit and chit’rin’,
At the wild-rinnin’ waters did yaumer and glower.
Faur frae their hame, seekin’ for pleasure,
The jaunters had gane, but nane could they fin’
Burnies and rivers fiercely were loupin’
Lood was the soun’ o’ the wild autumn wind.
‘Midst the gloom in the clouds the sun it was hidden,
Dowfu’ was the sigh for the weather tae fair;
Sonsie young kimmers wi’ fine silken blouses,
At their draigled appearance ye couldnae but stare.
When the storm it was endit, purses were lichter,
Lood was the speeches on the street we did hear, -
Laddies and lassies and sturdy auld billies
‘Gainst the change of the holidays loodly did swear.
